Unha pequena introducción
Como diciamos na entrada do bloque sobre Dereito Animal, a Declaración non é un texto legal. Porén, é un documento de máximo interese, por canto establece un horizonte e un obxectivo. Así este estándar internacional ten servido como fundamento para, entre outras, a Lei galega sobre animais de compañía.
Podedes atopar a versión en castelán desta Declaración, da que eu partín para a traducción, neste enlace: https://www.fundacion-affinity.org/la-fundacion/declaracion-universal-de-los-derechos-del-animal
Preámbulo
Considerando que todo animal posúe dereitos.
Considerando que o descoñecemento e o desprezo dos ditos dereitos ten conducido e conduce á humanidade a cometer crimes contra da natureza e contra dos animais.
Considerando que o recoñecemento por parte da especie humana dos dereitos á existencia doutras especies de animais constitúe o fundamento da coexistencia das especies no mundo.
Considerando que a humanidade comete xenocidio e existe a ameaza de que siga a cometelo.
Considerando que o respecto cara os animais pola humanidade está ligado ao respecto das persoas entre si propias.
E considerando que a educación debe ensinar dende a infancia a observar, comprender e amar aos animais.
A Liga Internacional dos dereitos do animal proclama o seguinte.
Artigo 1º:
Todos os animais nacen iguais ante a vida e teñen os mesmos dereitos á existencia
Artigo 2º:
1) Todo animal ten dereito ao respecto.
2) A humanidade, en tanto que especie animal, non pode atribuírse o dereito a exterminar a outros animais ou explotalos violando este dereito. Ten a obriga de por os seus coñecementos ao servizo dos animais.
3) Todos os animais teñen dereito á atención, aos coidados e á protección da humanidade.
Artigo 3º:
1) Ningún animal será sometido a malos tratos nin a actos de crueldade
2) Se é precisa a morte dun animal, esta debe ser instantánea, indolora e non xeradora de angustia
Artigo 4º:
1) Todo animal pertencente a unha especie salvaxe ten dereito a vivir libre no seu propio ambiente natural, terrestre, aéreo ou acuático e a se reproducir.
2) Toda privación de liberdade, incluso aquela que teña fins educativos, é contraria a este dereito.
Artigo 5º:
1) Todo animal pertencente a unha especia que viva tradicionalmente na contorna da humanidade, ten dereito a vivir e crecer ao ritmo e nas condicións de vida e de liberdade que sexan propias da súa especie.
2) Toda modificación do dito ritmo ou ditas condicións que fose imposto pola humanidade con fins mercantís é contrario a dito dereito.
Artigo 6º:
1) Todo animal que a humanidade teña escollido como compañeiro ten dereito a que a duración da súa vida sexa conforme coa lonxevidade natural
2) O abandono dun animal é un acto cruel e degradante.
Artigo 7º:
Todo animal obreiro ten dereito a unha limitación razoábel do tempo e da intensidade do traballo, a unha alimentación reparadora e ao repouso.
Artigo 8º:
A experimentación animal que implique un sufrimento físico ou psicolóxico é incompatíbel cos dereitos do animal, tanto se se trata de experimentacións médicas, científicas, comerciais, como de toda outra forma de experimentación.
Artigo 9:
Canto un animal é criado para alimentación, debe ser nutrido, instalado e transportado, así como sacrificado sen que disto resulte para el motivo de ansiedade ou dor.
Artigo 10º:
1) Ningún animal debe ser explotado por diversión da humanidade
2) As exhibicións de animais e os espectáculos que empreguen animais son incompatíbeis coa dignidade do animal
Artigo 11º:
Todo aquelo que implique a morte dun animal sen necesidade, é un biocidio, é dicir, un crime contra da vida.
Artigo 12º:
1) Todo acto que implique a morte dun grande número de animais salvaxes é un xenocidio, é dicir, un crime contra da especie.
2) A contaminación e a destrución do ambiente natural conducen ao xenocidio.
Artigo 13º:
1) Un animal morto debe de ser tratado con respecto.
2) As escenas de violencia nas que os animais son vítimas, deben ser prohibidas no cime e na televisión, agás se estas teñen como finalidade dar mostras dos atentados contra dos dereitos dos animais.
Artigo 14:
1) Os organismos de protección e salvagarda dos animais deben ser representados a nivel gobernamental.
2) Os dereito do animal deben ser defendidos pola lei como o son os dereitos das persoas.
(Nota: tal e como se explicita no Aviso legal da web, os contidos do blogue son… meus. Non tes dereito a usalos sen a miña autorización previa.
Non creo que haxa ningún problema en obtela se queres usar esta traducción, sempre que non sexa para un uso comercial. Pero pide a autorización, por favor).